Nagdangat na sa duha ka mga lalaki nga ginapatihan miyembro sang New People’s Army ang napatay sa nagluntad nga engkwentro batok sa 94th Infantry Battalion sang Philippine Army sa Barangay Bi-ao, Binalbagan, Negros Occidental.
Nahibaluan nga liwat nga nabatian ang paglinupok samtang naga pull-out ang Scene of the Crime Operation (SOCO) gikan sa encounter site pasado alas-3:00 kahapon sang hapon.
Ini kasunod sang engkwentro nga nag-umpisa pasado alas-2:00 kahapon sang kaagahon batok sa lima ka katapo sang NPA, kun sa diin isa ang una nga nasapwan nga napatay.
Ginkumpirmar sang Philippine Army nga ang biktima amo si Regie Pacheco alyas Dante, residente sang Sitio Bulasot, Brgy. Buenavista, Himamaylan City, nga financial logistics officer sang Central Negros 2 sang NPA kag miyembro man sang regional strike force sang Komiteng Rehiyon Negros.
Samtang, ang narecover naman nga bangkay sang lalaki kagab-i ang wala pa matumod ang identity.
Wala sang may nareport nga nasamaran sa tropa sang gobyerno sa liwat nga engkwentro.
Ginsuspender naman ang klase sa pila ka buluthuan sa nasambit nga lugar bangud sa risgo sa nagapadayon nga pag-atake sang makawala nga grupo.
Padayon naman ang hot pursuit operation sang 94th IB sa nabilin pa nga miyembro sang naka-engkwentro nga NPA.
