Ginklaro sang hepe sang Silay City Police Station, nga duha pa lamang ang napatay sa pagkabunggo sang Toyota Lite Ace sa nakapark nga 10 wheeler dump truck sa Hda. Sto. Rosario Brgy. Guimbalaon, Silay City, kahapon sang hapon.
Madumduman nga una ginpahayag ni Police Lt. Col. Mark Anthony Darroca, nga tatlo na ang ginbawian sang kabuhi.
Nagpangayo ini sang pasaylo sa una nga impormasyon, bangod sa pagkumpirmar sini sa ospital, buhi pa ang isa sa mga biktima apang na-comatose.
Ang driver sang Toyota Lite Ace amo si Argie Braceros, 31 anyos, residente sang Carmen Avenue 6, Brgy. 40, Bacolod City samtang ang mga sakay diri amo sanday Gino Aparra, 24 anyos, kag Rhea Mae Parreñas,21 anyos, mga residente sang Sitio Mansiginon, Brgy. Guimbalaon; kag Jerry James Diaz, 23 anyos; Dominador Pacheco, 23 anyos; Debie Brain Rojo, 27 anyos, mga residente sang La Carlota City; Blenchie Labiga, 26 anyos, residente sang Sitio Tuko, Brgy. Inolingan, Moises Padilla; Clint John Piodena, legal ang edad, residente sang Brgy Punta Taytay, Bacolod City.
Suno kay Darroca, magka-upod sa trabaho ang mga biktima nga naligo sa Sitio Lantawan, Brgy Guimbalaon.
Suno diri, nagabyahe na papauli ang mga biktima sang nadulaan sang kontrol si Braceros sa pagmaneho sang salakyan sa paglabay sa kurbada nga dalan.
Naglapaw ini sa lane kag nabunggo sa nakapark nga dump truck nga ginamaneho ni Arnold Capada, 42 anyos, residente sang Hda Camantero 1, Brgy Guimbalaon, Silay City.
Bangod sa impact, nagtabog ang anum ka mga biktima nga nagasakay sa likod sang Toyota Lite Ace kag gindeklarar nga dead on arrival sa ospital si Aparra samtang ginbawian sang kabuhi kaina sang aga si Diaz.
Si Piodena, naman ang kritikal sa karun ang kondisyon sa ospital.
Suno kay Darroca, natukiban nga yara sa impluwensya sang makahulubog nga ilimnon ang driver nga si Braceros kag madasig ang pagpadalagan sini sang salakyan.
