Ginalantaw sang Department of Health (DOH) nga magasaka ang numero sang fireworks-related injuries, nga nagsobra na sa 200.
Suno kay Assistant Secretary Albert Domingo, masobra 300 pa ka fireworks-related injuries (FWRIs) ang mahimo magdugang sa 235 ka mga insidente nga gin-report sang Enero 1.
Pahayag niya, ang kabug-usan nga numero sang mga napilasan ang mahimo magsaka pa bangud may mga late reports nga ginatipon kag gina-validate.
Una na nga ginpahayag sang DOH nga ang 235 ka firework-related injuries ang na-record sa bilog nga pungsod halin sang Disyembre 21 2025 tubtob alas-4 sang aga sang Enero 1, 2026.
Ang numero ang mas manubo sang 42 percent kun ipa-anggid sa 403 ka mga kaso nga na-record sa amo man nga tion sang nagligad nga tuig.
Ginpahayag sang DOH nga ang nagapanguna nga rason sini amo ang wala nahibaluan nga palupok, Boga kag 5-Star.
