Nagatalangison samtang nagapanawagan sang bulig gikan sa gobyerno ang isa ka amay matapos nga isa ang balay sini sa gintupok sang kalayo sa sunog nga nagluntad sa Purok Planeta, Brgy. Taculing, Bacolod City kahapon, pasado ala 1:00 ang takna kahapon sang hapon.
Sa interview sang Bombo Radyo Bacolod kay Eduardo Dangcal, isa sa mga nasunugan, wala ini sa ila balay sang nagluntad ang sunog bangud nagbiyahe ini sang tricycle kaupod sang iya asawa.
Suno kay Eduardo, nabatian nila ang balita sa radyo samtang yara sila sa Bangga Cory gani dali-dali sila nga nagkadto sa ila puluy-an agud tsekyaron ang ila bata.
Ginpahayag man sini nga wala naman siya makahibalo kun sa diin ang ila anak bangud ang iya asawa ang gindala man sa ospital matapos nga malipong.
Isa lang ang bata sini nga masami nga nagakabilin sa ila balay kun magbiyahe sila sang tricycle sang iya asawa.
Ginpahayag man sini nga mahimo nga ang masami nga pagsinggit kag pagkumod-kumod sang iya bata nga ginapahayag sang ila kasilingan ang tuga sang bisyo sini nga masami nga pag-inum kag ginalantaw man nga nagagamit sang illegal nga druga.
Ang ila nga bata man ang ginatudlo sang mga kaingod nga hungod nga nagtuga sang sunog.
Aminado man ini nga indi nila mabantayan ang ila anak bangud nagalinakat.
Samtang nagahilibion man ini nga nagapangayo sang bulig sa gobyerno bangud totally-damaged ang ila puluy-an.
Nagdangat naman sa anum ka pamilya ang apektado sa nasambitan nga sunog.
Tatlo diri ang totally damaged samtang ang tatlo ang partially damaged.
Ang halit nga gintuga sang sunog ang nagdangat sa P24,500.00 santo sa data sang Bacolod City Fire Station.
