Gin-athag sang pinuno sang National Telecommunications Commission (NTC) nga indi pwede makapatukod sang radio ukon television broadcasting stations kun wala sang nagakaigo nga prangkisa.
Suno kay Engr. Rodney Gonzaga, Officer in Charge sang NTC Bacolod, ang pagbawal sa pagpatakod kag pag-operate ang santo sa Radio Control Law.
Ang kongreso ang naga-isyu sang prangkisa, samtang ang NTC naman ang naga-isyu sang certificate of public convenience nga magapahanugot sa operasyon.
Ang tanan naman nga apelasyon ang ginapadala sa NTC main office sa Quezon City agud ma aprubahan.
Parehas naman nga legislative franchise ang ginahingyo sa AM ukon FM stations.
May pila naman nga wala na nagakinahanglan sang prangkisa kaangay sang non-commercial purpose nga ginalakipan sang training kag education.
Apang 10 watts lang ang mapahanugutan sa mga non-commercial stations ukon sarang lang magamit sang isa ka eskwelahanan indi kaangay sa mga radio stations nga nagadangat sa 1 Kilowatt ukon 1,000 watts.
Santo naman sa guidelines, indi pwede magdugang sang coverage ang non-commercial stations nga sarang malab-ot ang bilog nga ciudad, apang pwede naman ini nga i-apelar sa national NTC.
Kun igapasa naman ang operation franchise sa iban nga persona, ginakinahanglan naman nga may permit to transfer kag construction permit sa magapatukod.
May posibilidad naman nga madulaan sang gahum ang parangkisa kun matukiban nga ginpasa ini sa iban samtang wala sang nagakaigo nga permit.
Angot naman sa pagpatukod sang radio station nga sarang magamit sa pagtudlo sang mga estudyante karun nga may-ara sang CO VID-19 pandemic, sarang naman nga ipadangat sa nasyonal ang isyu agud nga mahatagan sang amendment ang layi.
Nahibaluan nga may gintukod kag ginpatigayon nga dryrun sang isa ka radio station sa Bacolod, apisar nga wala sang pahanugot angot sa pagsugod sang klase.
