Nagdesisyon ang National Unity Party (NUP) kag Liberal Party (LP) nga pabay-an ang ila tagsa ka mga miyembro nga magboto base sa ila nga konsensya sa nagahilapit nga plenary vote sang Kamara de Representantes angot sa impeachment ni Vice President Sara Duterte.
Suno kay NUP chairman kag Deputy Speaker Ronaldo Puno, wala sila sang ipatuman nga party stand sa ila nga grupo bilang pagrespeto sa kinamatarong sang kada mamalidha sa pagpatuman sang ila tagsa ka katungdanan sa idalom sang Konstitusyon.
Ginpaathag ni Puno nga magapabilin nga kaalyansa sang administrasyon ang NUP apang sa topiko sang impeachment, dapat pasulabihon ang kaugalingon nga paghukom sang tagsa ka miyembro.
Samtang, ginkumpirmar man ni Liberal Party president kag anay Deputy Speaker Lorenzo Tañada III nga “conscience vote” man ang mangin basehan sang ila partido.
Suno diri, naistoryahan na ini nila sa House contingent sa isa ka meeting sang Marso 3.
Sa kampo naman sang Partido Federal ng Pilipinas (PFP), ginpahayag ni House Assistant Majority Leader Javier Miguel Benitez nga may kasugtanan na ang ila partido matapos ang mga hearing.
Apang, sa plenaryo na lamang mahibaluan kun ano ang ila mangin boto.
Ginabug-usan sang 318 ka mga miyembro sang Kamara kag nagakinahanglan sang indi magnubo sa 1/3 ukon 106 nga boto agud maaprubahan ang Articles of Impeachment kag masumiter ini sa Senado para sa trial.
