Lauman sang mga commuters sa Lunes ang pagkaparalisar sang byahe sang 25 porsyento sang public utility jeepney sa Negros Occidental kadungan sang nationwide transport strike batok sa Public Utility Vehicle Modernization Program.
Sa interview sang Bombo Radyo kay Sentrong Samahan ng mga Tsuper at Operators Negros (SSTONE) secretary-general Jessie Ortega, nakabaton sila sang notice nagikan sa Alyansa Kontra Phase Out nga may patigayunon nga transport strike sa Lunes gani gilayon sila nga nagsapol kahapon.
Sa nasambit nga meeting suno kay Ortega, nakasugtan nga magaupod ang SSTONE kag iban nga transport groups nga magauntat sang byahe halin alas-5:00 sa aga tubtub alas-5:00 sa hapon sa Setyembre 30.
Bangud sini, lauman ang 25 percent paralyzation sang mga PUJ nga magabyahe.
Nagpanawagan man ini sa mga operator kag driver nga updan ang strike agud ipabutyag ang ila pagpamatok sa jeepney modernization program nga ipatuman na sa Hulyo 1 tuig 2020.
Panindugan ni Ortega, para lamang sa dalagko nga kompaniya ang modernization bangud hingalitan nila ang kahigayunan nga obligaron sang gobyerno ang magagmay nga operator nga mangin kabahin sang kooperatiba kag maka-operate sang modernized jeepney.
