Pagaupdan sang Negrense boxer nga si Ian Clark Bautista, tumandok sang Binalbagan, Negros Occidental kag ni Tokyo Olympian Irish Magno sanday Eumir Marcial kag Rogen Ladon sa pagmartsa padulong sa gold medal round sa 31st SEA Games matapos nakuha ang kadalag-an sa semi-finals sang 31st SEA Games sa Hanoi, Vietnam, Biyernes sang gab-i.
Nalutos ni Bautista si Sao Rangsey sang Cambodia sa men’s featherweight semifinals sa Bac Ninh Gymnasium.
Nakuha naman ni Magno ang kadalag-an batok kay Novita Sinadia sa women’s flyweight semifinals.
Paga-updan nila sanday Olympic bronze medalist Eumir Marcial kag defending SEA Games flyweight champion Rogen Ladon sa gold medal round.
Samtang nalutos naman si Tokyo silver medalist Nesthy Petecio kay Tran Thi Linh sang Vietname sa women’s featherweight semis.
Magapauli ini sang bronze, tatlo ka tuig matapos nakuha ang gold sa 2010 edition sang Games sa Pilipinas.
Sa men’s welterweight action, magapauli man sang bronze si Marjon Piañar matapos napierde ni Sarohatua Lumbantobing sang Indonesia.
Sang Huwebes, natapos man ang SEA Games journey sang mga boksidor nga sanday James Palicte, Josie Gabuco kag Riza Pasuit matapos nalutos sa ila tagsa-tagsa ka mga semis matches kag magapauli sang bronze.
Ang gold medal matches ang pagahiwaton sa Domingo sa Bac Ninh Gymnasium.
