Dako ang nabulig sang player sang Negros Occidental sa pagkampeon sang Western Visayas sa football secondary boys sa Palarong Pambansa 2019 sa Davao City.
Sa championship match nga ginpatigayon sa UP Mindanao football field, ginlutos sang Region 6 ang Region 7 sa isa gid lamang ka puntos nga abanse.
Una nga naka-goal ang team sang Central Visayas apang nakapasulod si Jayme Rosquillo sang Barotac Nuevo, Iloilo rason nga napatas sa 1-1 ang score.
Antes natapos ang second half, naka-goal naman si Gerhard Jenz Moreno sang Bago City, Negros Occidental.
Bangud wala na nakabawi ang Central Visayas tubtub matapos ang match, nakuha sang Region 6 ang kadalag-an.
Suno kay Coach Domingo Subo, nagaisahanon lamang si Moreno nga player nga nagikan sa Negros Occidental nga naka-impon sa mga humalampang nagikan sa Barotac Nuevo nga amo ang nagkampeon sa Western Visayas Regional Athletic Association Meet sa Roxas City.
Aminado si Subo nga wala naka-goal si Moreno halin sa quarterfinals apang gin-motivate niya ini nga pasanyugon ang performance sa final match.
Ginkalipay naman ni Subo ang ginpakita sang Negrense athlete.
Sa pihak nga bahin, silver medalist ang team sang Region 6 sa football elementary girls matapos malutos batok sa Region 7 sa score nga 2-1.
Una kuntani nga naka-goal sang Western Visayas apang sunod-sunod ang goal sang Region 7 kag wala na nakabawi ang Region 6.
