Isa patay samtang isa naman ang napriso sa Bacolod Police Station 6 matapos gin-alegar nga nagpanghold-up sa sa isa ka taxi driver kagab-i, Marso 2, 2026 sa Roxas Avenue, Brgy. 40, Bacolod City.
Ginkilala ang napatay kay alyas Ferdinand, legal ang edad, naga-trabaho bilang driver sang truck, residente sang Brgy. 28 samtang ang kaupod sini nga napriso amo si alyas Benjie, 31 anyos, pahinante, residente sang banwa sang Calatrava.
Sa interview sang Bombo Radyo Bacolod kay Police Capt. Peter John Ramos, Officer-in-Charge sang Bacolod Police Station 6, santo sa ila nga imbestigasyon nagsakay sa taxi nga ginamaneho ni alyas Gil, 74 anyos, halin sa downtown area ang duha ka mga suspek kag pag-abot malapit sa Lupit Church nag-deklarar ini sang holdup.
May dala nga kutsilyo kag wala mahibaluan nga armas luthang ang mga suspek.
Sang nagpanaog na ang mga suspek matapos makuha ang kwarta nga nagabalor P2,100, nagpanaog man ang taxi driver kag nagpangayo sang tabang kun sa diin na timingan man nga nabatian sang Mobile Patrol Unit sang Bacolod City Police Office nga yara sa lugar.
Ginlagas sang duha ka mga police ang mga holdupper apang nagbato ang isa sa mga suspek kag gintuyo nga bun-on ang police gani natiruhan ini kag nakaangkon sang pilas sa kilay.
Gindala pa sa ospital ang nasambit nga persona sa ospital apang wala na matabangan.
Gin-aresto ang kaupod sini kag nakahunong na sa Bacolod City Police Station 6.
Suno pa kay Ramos, ang duha ka mga suspek ang imbolbado na sa pila ka mga kaso sang robbery kag iligal nga droga.
Sa karun ginabulong pa sa ospital ang taxi driver matapos nga masamaran sang ini nagbato sa mga hold-uper kag ang isa sa nagresponde nga police matapos makaangkon sang pilas sang gintuyo nga bun-on sang isa sa mga suspek.
