BACOLOD CITY — Todo-hanas na ang softball team sang Negros Occidental nga magadala sang hayahay sang Pilipinas sa 10th Pacific School Games sa South Australia sa masunod nga bulan.
Ang mga softball players sang probinsya ang magasabak sa 17 years and under – girls category sang hinampang nga hiwaton sa Adelaide, South Australia sa Disyembre 3 tubtub 9.
Suno kay Coach Roselle Hulleza, Negros Occidental ang ipadala sang pungsod bangud nagchampion ini sa Palarong Pambansa 2017 sa probinsya sang Antique.
Bangud may yara sang overage na, walo lang ka mga players nagikan sa Domingo Lacson National High School ang magahampang samtang may tatlo nga kuhaon sa National Capital Region kag isa ka Bulacan.
Sa interview sang Bombo Radyo, ginpahayag ni Hulleza nga ini ang labing una nga hampang sang team sa luwas sang pungsod nga wala ang pitcher nga si Kaith Ezra Jalandoni.
Apang aminado ini nga maswerte ang team nga ini na ang ikatatlo nila nga hampang sa abroad subong nga tuig.
Bilang preparasyon suno sa coach, adlaw-adlaw ang ila paghanas kag Domingo lang ang pahuway.
Ang kompetisyon ang hiwaton sa Adelaide Shores Sports Complex, West Beach sa Adelaide, South Australia.
Todo-pagpanghanda naman ang mangin temporaryo nga pitcher sang Negros Occidental softball team nga magasabak sa 10th Pacific School Games sa South Australia sa masunod nga bulan.
Sa sini nga hinampang, indi makaupod sa grupo ang orihinal nga pitcher nga si Kaith Ezra Jalandoni bangud magasabak ini sa Asian Championship sa Taiwan, kadungan sang paindis-indis sa Australia.
Sa interview sang Bombo Radyo, ginpahayag ni Coach Roselle Hulleza nga ginpili si Glory Alonso nga amo ang mabulos kay Jalandoni.
Si Alonso ang nagabantay sa first base sang ara si Jalandoni.
Suno kay Hulleza, nagakaangay sa amo nga posisyon si Alonso bangud sa panglawason sini kag siya man ang nagaserbe nga substitute kun kapuyon si Jalandoni.
Suno kay Alonso, napressure siya sang una nga ginhambalan sang coach nga siya ang magabulos.
Apang positibo niya ini nga ginbaton sang gintugyanan ni Hulleza nga tion na agud ipakita ang iya masarangan.
Suno diri, luyag niya nga sundon si Jalandoni ilabi na ang stratehiya sini sa paghaboy sang bola.
Gin-ako man sini nga antes naglakat si Jalandoni sa Taiwan, naghatag ini sang tips kun paano mangin maayo nga pitcher.
