Bentaha para sa mga kapulisan kag militar sa Negros Occidental kun ma-implementar na ang Negros Island Region.
Suno kay Police Capt. Judesses Catalogo, spokseperson sa Negros Occidental Police Provincial Office, sa NIR, magatukod naman sang Negros Island Regional Police Office kag sila ang indi na magakinahanglan magtabok-tabok sa Panay para sa pagproseso sang dokumento, magreport kag para sa promotion sa Police Regional Office 6.
Sa plete pa lamang sa barko, masobra P1,000 na ang ila magastos kag magakinahanglan pa nga magpangita sang hotel kun indi matapos ang transaksyon sa isa ka adlaw.
Kaangay man ang sitwasyon sang Negros Oriental Police Provincial Office bangod ang Police Regional Office 7 ang yara man sa Cebu.
Indi man tuman ang epekto sang panahon kun “by land” ang byahe indi kaangay sa barko nga automatic nagakanselar sang byahe.
Samtang madamo man sang ginalantaw nga promotion kag mabakante nga pwesto kun makatukod na sang bag-o nga Regional Office.
Bentaha man sa mga militar ang pagseguro sa peace and order situation kun matukod na ang NIR.
Suno kay Lt. Col. J-Jay Javines, chief sa Public Affairs Office sang 3rd Infantry Division sang Philippine Army, mahapos na ang pagdul-ong sang socio-economic services kag infrastructures sang gobyerno, samtang makafocus naman ang pwersa militar sa isa lamang ka isla kalakip na ang Siquijor.
