Ginpasalig sang gobernador sa Negros Occidental nga magapadayun ang bulig sang Provincial Government sa mga Kanlaon evacuees tubtob nga sila ang yara sa evacuation centers.
Sa pahayag ni Negros Occidental Governor Eugenio Jose “Bong” Lacson, yara pa sa masobra anom ka libo ang Internally Displaced Persons (IDPs) sa banwa sang La Castellana, Bago City kag La Carlota City.
Pahayag sini nga sa una nga duha ka bulan bulos-bulos ang provincial government kag apektado nga local government units sa pagpakaon sa mga evacuees.
Sa nakaligad nga duha ka bulan, ang gingamit sa pagpakaon amo ang donasyon gikan sa Malacañang nga P50 million.
Nahibaluan nga P12 million diri ang gintalana para sa permanent rellocation site sang mga nagapuyo sa sulod sang 4km permanent danger zone.
Sini nga semana, maga-untat anay ang provincial government sa pagpakaon, apang pasalig sang gobernador nga magabalik man ang mga ini sa masunod nga semana.
Apang tubtob lamang sa Abril kag Mayo ang masustiner nga mapakaon sa donasyon gikan sa Malacañang, kag ang masunod nga bulan ang kuhaon na sa 2025 Provincial Budget.
Aminado si Lacson nga wala na sang pondo ang mga apektado nga LGUs partikular na ang banwa sang La Castellana.
Apisar nga may iban man nga interventions kaangay sa Department of Social Welfare and Development nga nagahatag sang family foodpacks, ang probinsya gid ang naga-abaga sang tatlo ka adlaw nga pagpakaon sa mga evacuees paagi sa mga community kitchen.
Sa community kitchen, kalabanan sa mga ginahire ang gikan man sa mga IDPs.
