Ginpahayag sang gobernador sang Negros Occidental nga kun epektibo ang resulta sang African Swine Fever vaccine, iga-avail man ini sang probinsya.
Suno kay governor Eugneio Jose ‘Bong’ Lacson, sa karun nga may 10,000 doses na sang vaccine nga ginroll-out sa Batangas province, pagabantayan na lamang kun ano ang mangin resulta sini.
Suno diri, kun effective ang bakuna, ginalauman sini nga mapalab-ot diri sa probinsya ang vaccine.
Dugang pa sini, kun yara na ang vaccine, panugyan sini sa mga hog raisers nga ipreparar ang ila mga baboy para maka-avail sang bakuna.
Samtang, sa karun nagbalik na sa pink category ang mga banwa kag ciudad nga anay yara sa red status sang pagduging sang ASF kag padayon man sa gihapon nga strikto ang pagbantay sa mga puerto kag boundaries sa pagpasulod sang mga baboy nagikan sa luwas sang probinsya.
Sa, ginalauman sang presidente sang Alliance of Hog Raisers Association of Negros Occidental (AHRANO) nga mahatagan sang African Swine Fever vaccine ang probinsya.
Sa interview sang Bombo Radyo Bacolod kay Ric Lauron, 10,000 doses pa lamang ang naprocure kag nauna nga ginhatagan sang bakuna batok sa ASF ang probinsya sang Batangas.
Suno diri, sa karun ginapanilagan pa ang resulta sang roll out sang vaccine.
Suno kay Lauron, may mga palamangkotanon pa sa vaccine bangod ini ang para pa lamang sa piglets kag sa growers ukon ini ang may 4 months immunity lamang.
Ang vaccine ang yara pa sa procedure nga trial and error kun sa diin sa total nga numero sang baboy sang isa ka hog raiser, 50 percent lamang diri ang ginbakunahan kag panilagan sa sulod sang 27 ka adlaw.
Dugang pa gid nga palamangkotanon amo nga kun ano ang masunod nga tikang kun indi epektibo ang vaccination.
Apang, kun mangin epektibo naman ang vaccine, suno kay Lauron dako ang mangin bulig sini ilabi na nga amat-amat na nagasaka ang recovery rate sang hog industry sa probinsya.
Samtang, nagpanugyan naman ini nga i-intesify ang biosecurity measures agud mahagan-hagan ang pag-igo sang ASF samtang wala pa sang credible vaccine kag kun may yara gid man, wala pa naka-avail sini ang probinsya.
