Gin-athag sang pinuno sang Provincial Health Office nga wala sang kaso sang local transmission sa probinsya apisar nga may yara sang duha ka mga frontliners nga nagpositibo sa COVID-19.
Sa interview sang Bombo Radyo kay Dr. Ernell Tumimbang, ginpahayag sini nga indi makonsiderar nga local transmission ang pagpositibo sang duha ka mga frontliners nagikan sa Murcia kag Pontevedra bangud nakuha nila ang balatian sa gwa sang probinsya.
Suno kay Tumimbang, kun magpositibo sa virus ang mga nakaclose contact sang duha ka mga frontliner, dira pa lang mahambal nga may yara sang local transmission.
Suno sa iya, ginahulat pa sa karun ang resulta sang RT-PCR tests sang mga nakacontact sang duha.
Gindugang man sini nga asymptomatic man ang mga pasyente gani nubo ang chansa nga makalaton ang mga ini.
Nagpasalig man ang provincial health officer nga apisar nga padayon nga nagadamo ang kaso sang COVID-19, yara gihapon sa ibabaw sang sitwasyon ang probinsya.
