Ginpirmahan ni Negros Occidental Governor Eugenio Jose “Bong” Lacson Martes sang gab-i ang blue alert status para sa bilog nga probinsya matapos sang pila ka oras nga tayuyon nga pag-ulan.
Nahibaluan nga northeastern section lang sang Negros Occidental ang ginpaidalum sa Storm Signal No. 1 bangod sa Bagyo Dante.
Suno kay Dr. Zeaphard Gerhart Caelian, pinuno sang Provincial Disaster Management Program Division (PDMPD) sang Negros Occidental, ang bilog nga probinsya ang ginbutang sa blue alert status bangod nagapati ang gobernador nga indi dapat magpakampante, ilabi na nga tanan nga bahin sang probinsya ang makabatyag sang epekto sang bagyo.
Ang pagpaidalom sa “Blue Alert Status” ang nagapahanugot naman sa tanan nga mga Disaster Risk Reduction Management Offices (DRRMO) kag Operation Centers nga mangin alerto kag magmonitor sang sitwasyon.
Samtang isa naman sa nahalitan sang segi-segi nga pag-ulan amo ang banwa sang Isabela kun sa diin nagpatigayon na sang rescue kag evacuation operations sa mga residente.
Nag-augment naman ang DRMMO sang banwa sang La Castellana, Binalbagan kag ciudad sang Himamaylan agud nga magbulig sa rescue kag evacuation operations sang banwa sang Isabela.
Suno kay Caelian, dapat man nga mangin handa ang mga ini sa posibilidad sang flashfloods kag landslide.
Samtang nagpasalig man si 303rd Infantry Brigade Commander Col. Inocencio Pasaporte, nga nakahanda sila nga maghulag sa tion nga kinahanglanon sang probinsya sang bulig.
Ginhatagan naman sang mandu ang mga local government units (LGUs) nga magpreparar na sang evacuation centers kag nagapati naman si Caelian nga nakahanda na ang mga ciudad kag banwa sa probinsya.
Ginapasalamatan naman ni Caelian ang mga nagbuylog sa ginapatigayon nga rescue kag evacuation operations kag ginapahanumdom man sa mga pumuluyo ang proactive preparedness kag bayanihan spirit sa tion sang bagyo.
Pahanumdom man sini nga mag-ulu-aligmat ang mga pumuluyo, ilabi na nga nagahilapit nga maglabay si Bagyo Dante sa bahin sang Visayas.
