Gin-eksplikar sang opisyal sa Negros Electric and Power Corporation (NEPC) ang nagatuga sang system losses sa kuryente.
Sa interview sang Bombo Radyo Bacolod kay Engr. Christian John Villena, Corporate Energy Sourcing and Regulatory Affairs Manager sang Negros Power, may-ara sang technical kag non-technical system losses.
Ang pinakadako ang tuga sang non-technical system losses nga nagakatabo sa pagtravel sang kuryente sa linya padulong sa masunod nga transformer.
Ini ang makumparar sa ice nga mabakal sa tyangge kag kun malayo pa ang pulian, may bahin nga nagakatunaw na, apisar nga ang ginbayaran ang bilog pa nga ice.
Suno diri, ang Negros Power ang magasunod ano man ang ipatuman sang layi.
Apang nagalaom sini nga matun-an pa sang maayo kun paano ang proseso sa pagdula sang system losses sa mga electric consumers.
Kwestyon pa nila kun isubsidize sang gobyerno ang dulaon nga system loss charges sa mga konsumedor.
Suno diri, sarang man mapanubo ang system losses apang kinahanglan nga islan ang mga power lines, kag mapasaka ang elevated metering.
Panindugan ni Villena nga sa tanan nga aspeto halin sa power generation, power transmission, kag power distribution, may-ara sang system losses.
Pahayag sini nga may ginhatag nga cap ang Energy Regulatory Commission nga 8.75 percent sang total cost para sa system losses, apang ang sa Negros Power ang yara lamang sa 6.74 percent, samtang P1.23 naman ang rate para sa system losses.
Nakadepende naman sa kadakuon sang konsumo ang system loss charge sa kada konsumedor.
Dugang pa ni Villena nga sa ginasukot nga sa bilog nga electric billing, 10 porsyento lamang diri ang nagakadto sa Negros Power bangod ang iban ang ginabayad man sa power distributor.
