May pagnubo sa power rate para sa bulan sang Marso.
Sa interview sang Bombo Radyo Bacolod kay Engr. Leomel Tambanillo, assistant Vice President for Planning and Business Operation sang Negros Electric and Power Corporation (NEPC), gikan sa P12.14 per kilowat hour, ang power rate ang nagpanaog sa P11.47 per KwH para sa subong nga Marso ukon nagnubo sang 67 sentimos.
Ang nagapanguna nga rasun amo ang pagnubo sang presyo gikan sa Wholesale Electricity Spot Market (WESM) kag nagnubo man ang transmission charge sang National Grid Corporation of the Philippines (NGCP).
Dugang pa sini nga may isa ka Power Generator nga naghimo sang adjustment nga pagpanubo sang 15 sentimos sa ila charge epektibo tubtob sa Disyembre subong nga tuig.
Apang wala naman sang pagbag-o sa distribution supply metering charges nga P1.18, nga source of revenue sang Negros Power.
Sa karun ang Negros Power ang isa sa Power Distribution Utilities nga may pinakamanubo nga power rate sa Pilipinas.
Sa pihak nga bahin, may pahanumdom man si Tambanillo sa mga member-consumer partikular na nga nagahilapit ang summer season.
Pahanumdom sini nga apisar naga-ulan ulan sa karun, pasulod na ang summer season gani dapat mangin conscious sa paggamit sang kuryente.
Sa mainit nga tiyempo, masami nga nagadako man ang electric bill bangod sa mahakog nga kaon sang cooling appliances kaangay sang aircon, refrigerator kag electric fan.
Gani dapat nga magtipid sa paggamit sang kuryente agud indi man matam-an sa balayran.
