Nagmadinalag-on siya sadto sa pagbulag sang conjoined twins ukon nagatapik nga kapid apang wala gid nakaluwas ang isa ka doktor sa Estados Unidos sa coronavirus disease.
Napatay bangod sa coronavirus disease si Dr. James Goodrich nga isa ka kilala nga neurosurgeon nga nagpabulag sang kapid nga sanday Carl and Clarence Aguire.
Ang kapid nga lunsay mga taga Silay City diri sa Negros Occidental ang nabulag sa Montefiore Medical Center nga nahamtang sa Bronx, New York kag isa si Dr. James Goodrich nga isa ka pediatic neurosurgeon sa mga nag-opera diri.
Mas nakilala ang doktor bangod sa kondisyon sang kapid nga may yara sang nagatapik nga 8 centimeters nga brain tissue.
Masubo nga balita ilabi na sa mga napaayo kag mga nakaupod sa trabaho ang kamatayon sang doktor.
Suno sa CEO sang Montefiore Medicine nga si Dr. Philip Ozuah, ikaduha lang ang pagka-eksperto kag abilidad ni Goodrich sa tagipusuon sini kag ugali.
Dako ang pagkahangawa sang ospital kay Goodrich kag kilala ini nga wala nagahandom sang kasikatan kag ginapalangga sang mga kaupod sa trabaho.
Ginkilala man ang ugali sini nga pagdul-ong sang mga gin-bake nga cookies sa mga nagatrabaho nga nurses.
Suno naman kay Dr. Emad Eskandar, magapabilin sa tagipusuon kag paminsaron sa ila nga department ang doktor kag ginakilala ini bilang isa ka master surgeon, world class educator nga ginapalangga sang tanan.
Kilala man ang doktor nga pioneer sa patag sang pagbulig sa mga kabataan nga may yara sang complex neurological conditions.
Nakahuman man ini sang multi-stage nga pag-agi sang pagseparar sa mga craniopagus twins kaangay sa kapid nga sanday Jadon and Anias Mcdonald nga may yara sang nagatapik nga bagul kag utok.
Ang kapid ang ikapito na nga separation surgery sang doktor.
Kilala man ang doktor bangod sa pagpalangga sini sa mga pasyente kag wala gid nagakalipatan ang mga birthday sang mga ini.
Ang doktor nga yara na sa iya 70’s kag nakatrabaho sa masobra 30 ka tuig sa Montefiore Einstein kag nangin direktor sa Division of Pediatric Neurosurgery sa Montefiore.
Nangin propesor man ini sa clinical neurological surgery, pedriatics, plastic and reconstructive surgery sa Albert Einstein College of Medicine.
Ang kapid nga sanday Clarence kag Carl Aguirre ang nabun-ag sang April 21, 2002 sa Silay City.
Sang 2003, sila ang gindala sang ila iloy nga si Arlene sa Estados Unidos kag sila ang madinalag-on nga naseparar nanday Dr. Goodrich.
