Madumduman nga kasunod sang natabo nga engkwentro sa Brgy Salamanca, Toboso, Negros Occidental sang Abril 19, natigayun man nga maaresto ang lima ka NPA members sa Brgy Matab-ang, Talisay City sang Abril 22.
Sa impormasyon sang Bombo News Team, ang mga naaresto ang ginkilala nga sanday Glemmar Ruelis Bacusmo, 48 anyos, residente sang Prk Golden Shower, Brgy. Poblacion, Ipil, Zamboanga Sibugay; Danny Boy Pacheco, 34 anyos, residente sang Sitio Buli, Brgy. Bagonbon, San Carlos City; Judy Manayon Caramihan, 34 anyos kag Julie Ann Balora, 26 anyos, lunsay residente sang Brgy. Santa Rosa, Murcia; kag si Jerome Escamrosa Seballos, 57 anyos, residente sang Brgy. Bata, Bacolod City.
Ang mga ini ang ginalantaw nga mga kaupod man sang mga na-engkwentro sang militar sa Toboso, bangod may-ara sang may pilas sa iya nga tangkugo.
Sa impormasyon gikan sa Police Regional Office Negros Island Region, si Alyas Glem ang Rank 2 Regional Most Wanted Person sa kaso nga Theft, Robbery, Multiple Frustrated Murder, Multiple Murder, Crimes Against Humanitarian Law, Genocide kag iban pa nga Crimes against Humanity, kag Attempted Murder.
Sa pag-aresto nakuha kay Glem ang isa ka unit sang cal. 45 Taurus pistol, made in Brazil; magazine nga may lima ka live ammunition sang cal. 45; isa ka hand grenade, kag blue nga belt bag.
Nakuha naman kay Alyas Dan ang isa ka unit sang cal. 45 (ACP) M1911A1 US Army pistol; magazine nga may apat ka live ammunition sang cal. 45; isa ka hand grenade nga wala sang serial number; kag itom nga sling bag.
Nakuha naman kay Alyas Ju ang isa ka unit sang cal. 45 Grandmaster pistol; magazine nga may anom ka live ammunition sang cal. 45; itom nga holdster; isa ka hand grenade; kag grey nga sling bag.
Samtang narecover naman kay Alyas Jud ang isa ka unit sang cal. 45 Rock Island pistol; magazine, kag siyam ka live ammunition sang cal. 45; isa ka hand grenade; grey nga belt bag; kag isa ka violet nga lighter.
