BACOLOD CITY — Gina-verify sa karon ang ngalan sang mga politiko nga posible magdugang sa listahan sang narco-politicians ukon may kaangtanan sa ilegal nga druga.
Ini ang ginpahayag ni Surigao del Norte Congressman Robert Ace Barbers, chairman sang House Committee on Dangerous Drugs, nga nagkari sa Negros Occidental sang tinalikdan nga adlaw.
Suno kay Barbers, nagapati ini nga updated ang narco-list nga uyat ni Presidente Rodrigo Duterte apang nakabaton ini sang impormasyon nga may bag-o nga mga ngalan nga gina-validate.
Suno kay Barbers, wala pa nakabaton ang iya komitiba sang report tuhoy sa mga bag-o nalakip sa narco-list sang administrasyon.
Apang ginadayaw sini ang anti-drug war ni Duterte bangud pinaagi sini nahisayran sang publiko ang kasangkad sang problema sang pungsod sa ilegal nga druga.
Nalakip na diri ang kadamuon sang mga opisyales sang gobyerno, korte, militar, kag kapulisan nga imbolbado kag nagahatag sang proteksyon sa mga durugista.
Samtang, sa tunga sang pagkritisar kay Presidente Duterte bangud sa kadamuon sang mga nagakalamatay sa gyera kontra druga, nagaduda naman si Cong. Barbers sa ginapahayag sang mga kritiko nga ginmandu sang presidente ang pagpamatay.
