BACOLOD CITY – Wala nangin upang ang pagka-‘no read, no write’ sang isa ka iloy sa ciudad sang Himamaylan, probinsya sang Negros Occidental agud mapatapos ang siyam ka mga anak sa pag-eskwela sa pihak sang kapigaduhon sang pamilya.
Ang kasaysayan ni Dodong ukon Ramy Entierro sa matuod nga kabuhi ang gindeklarar nga kampeon sa awarding sang Light at the End of the Tunnel sang Kahapon Lamang Program sang Bombo Radyo Bacolod, Lunes sang hapon, kag nagbaton sang P10, 000.
Ang 84-anyos na sa karun nga si Nanay Sayong ang daw kaangay sang superwoman sa bulig sang iya nga mister amo gani nga professionals na ang iya siyam ka mga anak kag isa na diri si Dodong nga Outstanding Rice Farmer kag nangin 2015 Gawad Saka Awardee.
Suno kay Dodong, masami ginamuno sang una sang iya iloy nga kun may yara sang kompetisyon, mangin best story ang ila kasaysayan amo gani nga sang nabatian ang promo sang Kahapon Lamang, nagbuligay sila nga mag-utod agud nga mabalay ang sulat, kag wala gid nagsala si Nanay Sayong sa iya nga forecast.
Samtang, 1st runner-up naman nga nagbaton sang P7, 500 si Lily ukon Raylene Prado sang Bago City nga isa ka cancer survivor kag bulag sa bana apang napatapos sini ang tatlo ka mga kabataan.
Lubos naman ang kalipay sang birthday celebrator nga si Nanay Ming ukon Dominga Neones, 68-anyos, matapos nagdaog bilang 2nd runner-up kag nagbaton sang P5, 000 matapos ginpaambit ang kasaysayan tuhoy sa madinalag-on nga pagpa-eskwela sa lima ka mga anak bisan pagbaligya lamang sang kalan-unon kag isda ang ila palangabuhian.
