Ginpanindugan sang deputy for operations sang Negros Occidental Police Provincial Office (NOCPPO) nga engkwentro ang nagluntad sa Sitio Kalanugan, Barangay Minapasuk, Calatrava, Negros Occidental kahapon sang aga kag indi ambush.
Madumduman nga nagbakbakanay ang katapo sang Calatrava Municipal Police Station kag armado nga rebelde nga grupo alas-9:40 kahapon sang aga, kun sa diin isa ka pulis ang napatay samtang duha naman ang pilason kalakip na ang deputy chief of police nga si Police Capt. Jesus Alba.
Suno kay Police Lt. Col. Joem Malong, ang Calatrava Municipal Police Station ang nagapatigayon sang Joint Government Initiated Operation sa pagserbe sang warrant of arrest sa mga katapo sang Communist Terrorist Groups (CTGs) kaupod sa 79th Infantry Battalion, Regional Mobile Force Battalion 6, 6th Special Action Batallion kag 1st Negros Occidental Police Mobile Force Company sa Sitio Upper Ikugan, Barangay Minapasuk.
![](https://img.bomboradyo.com/bacolod/2023/08/CALATRAVA-ENCOUNTER-AUG-9-2023-AAA.jpg)
Paathag sini nga natabuan lamang nga kadungan sa ila nga pagserbe sang warrant of arrest, may nagluntad man nga pagpangluthang sa area sang aga gani ila man ini nga kumpirmahon kuntani.
Nahibaluan nga alas-5:00 kahapon sang kaagahon, ginluthang patay man ang magtiyo nga sanday Felix kag Eliseo Risutay.
Suno kay Malong indi paman nila matumod kun ang naka-engkwentro sang mga kapulisan amo ang mga New People’s Army (NPA) nga ginpangalanan kanday Darry Dayawan, Charity Amacan kag tanan nga miyembro sang CTGs sa lugar nga ila kuntani nga serbihan sang warrant.
Wala paman suno diri nakumpirmar ang presensya sang improvised explosive device (EID), gani indi makabig nga ambush ang natabo.
Sa engkwentro, nadulaan sang kabuhi si Police Corporal Jayme Nuñez samtang nasamaran naman si Police Capt. Jesus Alba, nga nadischarge na sa Sagay District Hospital samtang si Police Corporal Dennis Nasis nga nag-angkon sang patal nga samad ang gindala sa ospital sa Bacolod City.