Ginpaidalum sa surprise drug test ang mga kapulisan sa Negros Occidental Police Provincial Office (NOPPO) kaina sang aga.
Sa interview sang Bombo Radyo kay NOPPO Director Police Colonel Romeo Baleros, ginkompirmar sini nga 65 tubtob 100 ka mga pulis ang nagpaidalom sa drug test.
Suno kay Baleros, nakibot ang mga pulis nga yara ang mga taga crime lab dala ang mga gamit pangdrug test pagkatapos sang flag ceremony.
Suno sa iya, ginpatigayon ini agud mapasiguro nga wala sang may nagagamit sang iligal nga droga bangud ang kapulisan ang mismo nagapangdakop sa mga drug addict.
Kun magpositive ang pulis sa drug test suno kay Baleros, pasakaan ini sang administrative kag criminal charges.
Ginpaathag man sang director nga wala sila sang may ginadumtan ukon target nga PNP personnel kag gin-ubra lang ini agud masigurado nga wala sang may nagagamit sang illegal drugs sa NOPPO.
Suno kay Baleros, nagpatigayon man sang surprise drug test ang San Enrique Municipal Police Station kag Himamaylan City Police Station.
