BACOLOD CITY – Palaligban sa karun kun ano ang kabangdanan sang pagkapadpad sang isa ka oarfish sa banwa sang Laua-an sa probinsya sang Antique kahapon sang hapon, Miyerkules.
Gilayon nga nagresponde ang Municipal Agriculture’s Office matapos nakita sang mga residente ang oarfish sa Barangay Oloc, sa banwa sang Laua-an.
Ang oarfish ukon king of herrings kag ginatawag man nga rooster fish ang nagalaba sang lima ka tapak.
Sa interview sang Bombo Radyo kay Flord Nicson Calawag, biodiversity researcher sa Tibiao, Antique, bata pa ang nasambit nga species kag ini ang pinakagamay nga oarfish nga nakit-an sa probinsya.
Paathag sini, madamo sang mga palatandaan kun ngaa nagapakita ang amo nga isda kag isa na diri ang pagpangita sang pagkaon ukon mahimo nga gindala ini sang dako nga balod.
Magluwas diri, may mga oarfish man nga nagapanginmatay ukon naga-suicide ukon nabatyagan sang mga ini ang vibration sa idalom sang dagat nga palatandaan sang linog; kag mahimo man nga nadisturbo bangud sa underwater drilling sa West Philippine Sea.
Ang oarfish ang naga-istar 1, 000 meters below sea level kag ginabansagan nga longest bony fish sa bilog nga kalibutan.
