BACOLOD CITY – Tuman nga ginakasubo ni Bishop Patricio A. Buzon sang Diocese of Bacolod ang tensyon nga nagluntad sa St. John’s Institute (SJI) ukon mas kilala sa tawag nga Hua Ming, sadtong Abril uno, Sabado, nga nagresulta sang huol sa mga sumilimba sa Queen of Peace Church nga nahamtang sa sulod sang campus sang eskwelahan.
Sa open letter nga ginpaguwa sang Obispo sang Bacolod, ginpabutyag sini ang kasubo nga nagdangat sa indi maayo ang mainit nga komprontasyon sa tunga sang lideres sang parokya kag sang eskwelahan ang simple nga pagtakod sang tarpaulin sa diin napagkit ang anunsyo sang mga aktibidades sa palaabuton nga Semana Santa.
Madumduman nga may natabo nga pagbaisay sa tunga nanday Fr. Ernie Larida kag SJI Board of Trustees President Cesar Villanueva sadtong Abril uno nga nagresulta sa pagpasira sang main gate sang eskwelahan.
Nagpangayo sang pasaylo si Bishop Buzon sa eskandalo nga ginkaulamiran sang simbahan kag nagapanawagan ini sa mga imbolbado nga istoryahan ang komplikto nga nagapatunga sa ila.
Labi pa gid nga ginakasubo sang Obispo ang desisyon sang Board of Trustees sang SJI nga siradhan ang main gate kag dumilian ang mga salakyan sang mga parokyano kag sumilimba sa pagsulod sa grounds sang simbahan bilang reaksyon sa amo nga hitabo.
Gina-kwestyon ni Buzon ang paghatag sang kabudlayan sa publiko para sa pagbaisay sa tunga lamang sang pila ka indibidwal.
Suno sa Obispo, ang nasambit nga polisa sang Hua Ming ang nagtuga sang daku nga huol sa tanan ilabi na sa mga kabataan, mga katigulangan, mga masakiton kag may kapaltahan sa lawas.
Samtang, gindugang pa ni Buzon nga kaangay nga amat-amat nga ginapatay paagi sa pagkuga ang parokya sang Queen of Peace Church.
Ginpahayag sang Obispo nga ini ang pinakaulihi sa serye sang mga restrictions nga amat-amat ginpatuman sang SJI sa parokya.
Suno sa iya, humalin sang pagsugod sang tuig, ang mga sumilimba ang naka-eksperyensiya sang daku nga kabudlayan sa pagsulod sa simbahan, pila ka mga kwwarto sa rectory ang ginpasira kag subong man ang mga alternative doors, kag may nagapadayon pa nga plano sa pag-takeover sang ground floor sang rectory nga ginagamit subong bilang opisina sang parokya.
Sa karon, ang tanan nga salakyan nga may kahilabtanan sa mga aktibidades sang Queen of Peace Church ang ginadumilian sa pagsulod sa simbahan, lakip na ang parish vehicles.
Bangud sini, ang tanan nga sumilimba ang kinahanglan nga maglakat pasulod sa simbahan kag sa sini, suno kay Bishop Buzon, kaangay nga amat-amat ginapatay ang parokya.
Sa pihak sini, nagpamat-od si Bishop Buzon nga magapadayon ang pagpatigayon sang balaan nga misa sa Queen of Peace Church sa pihak sang konflikto sa tunga sang mga katapo sang simbahan kag Board of Trustees sang Saint John Institute (SJI).
Suno kay Bishop Buzon, magapadayon nga mangin tampad ang simbahan sa misyon sini kag magapadayon sa iya katungdanan nga mag-ulikid sa mga pumuluyo.
Bangud sini, suno sa Obispo, ang mga misa kag tanan nga sakramento ang padayon nga pagahiwaton sa Queen of Peace Church.
Samtang, ginpabutyag ni Bishop Buzon nga ang hitabo sadtong Abril uno ang nagakinahanglan sang gilayon nga pagpatuman sang desisyon sini angot sa amo nga kontrobersiya.
Bangud sini, ginahingyo ni Bishop Buzon ang Board of Trustees sang Hua Ming nga magpungko upod sa Diocese sa maabot nga Abril 17 kag magkaupod nga magdihon sang Memorandum of Agreement angot sa iya desisyon angot sa issue.
Ang MOA ang ginalauman sang Obispo nga maamligan ang otonomiya sang simbahan sa pagpatigayon sang pastoral life kag ministry sa mga tumuluo bilang kabahin sang commitment sini sa kaayuhan sang Chinese apostolate.
Angot sini, ginpahayag ni Fr. Felix Pasquin, rector sang San Sebastian Cathedral, nga respetuhon na lamang ang desisyon sang Obispo sa amo nga eskandalo nga ginakaulamiran sang simbahan.
