Ginalantaw sang Office of Civil Defense nga gamiton ang Yolanda Housing Units bilang temporaryo nga evacuation centers para sa mga evacuees pananglitan nga magsaka sa alert level 4 ang status sang bulkan Kanlaon.
Suno kay OCD-Region 6 Director Raul Fernandez, may yara sang Yolanda Housing Units sa ciudad sang Bacolod, Sagay, Victorias, Silay kag Escalante kag banwa sang Manapla kag EB Magalona.
Suno diri, ginpa-inventory na sa mga Local Government Units ang kadamuon sang housing units sa ila tagsa ka area sa ginalauman nga kapin sa 37,000 ang dugang nga mga evacuees gikan lamang sa banwa sang La Castellana kun magsaka pa gid ang alert level sang bulkan.
Suno kay Fernandez, iban sa mga units ang may naka-akupar na samtang ang iban ang wala na-award sang LGU’s sa mga beneficiaries.
Samtang, isa pa sa ila ginapangitaan sang solusyon sa karun kun paano madugangan ang transport vehicle sa banwa sang La Castellana nga sa karun may yara lamang sang apat ka truck nga ginagamit sa pagbyahe sa mga evacuees.
