BACOLOD CITY — Kadungan sang obserbasyon sang World Psoriasis Day subong nga Oktubre 29, may yara sang panawagan ang isa ka miyembro sang Psoriasis Iloilo sa nagabatyag sang sini nga balatian.
Sa interview sang Bombo Radyo, ginpahayag ni William Bill Dellota nga indi dapat magkahuya ang nagasufrer sang sini nga balatian nga maggwa kag magpangita sang kaangay nga pasyente agud nga may yara sang pautwasan.
Ang Psoriasis Philippines suno kay Dellota ang may programa para diri kag pangitaon lamang ang Facebook page sang support group nga nagatanyag sang bulig nga wala sang bayad.
Pinaagi diri, makapaambit sang mga impormasyon ang mga pasyente sang psoriasis kag sila mismo ang makasugiray sang ila ginabatyag bangud sila man mismo ang makaintindi sa isa kag isa.
Suno kay Dellota, nakit-an niya mismo sa iya iloy nga luyag sini nga siya ang buligan apang mas lain ang pamatyagan kun makaistorya sa pareho nga pasyente sang psoriasis.
Nahibaluan nga may yara sang lain-lain nga sahi sang psoriasis kag gin-classify na ini sa karon sang World Health Organization bilang isa ka autoimmune disease.
Wala pa sang bulong para sa psoriasis kundi ginapahagan-hagan lang ang sintomas sini.
Aminado naman ang isa ka pasyente sang balatian nga psoriasis diri sa Negros Occidental nga dako ang epekto sang nasambit nga balatian sa ila pamilya apang nagtinguha siya nga magpakabakod.
Si Ma. Teresa Estampador ang na-diagnose nga may psoriasis sang tuig 2001.
Sa interview sang Bombo Radyo, ginpahayag sini nga iya ginpaminsar nga kaspa lamang ang nagakatol sa iya ulo gani iya nga gin-balewala.
Apang amat-amat ini nga naglapad tubtub sa iya agtang kag isa ka adlaw, indi na siya makahulag sang maayo bangud nagapalanakit ang iya lawas.
Bangud sini, siya ang naconfine sa ospital apang bangud indi pa tuman kakilala ang psoriasis sadto, naggwa siya makaligad ang tatlo ka adlaw kag ginresetahan lang sang pain reliever.
Bangud sang masakit, siya ang nagretiro sa trabaho sang temprano.
Ginbayaan man ini sang iya bana bisan may isa na sila ka anak rason nga sa pamilya nalang ini nagasandig.
Suno diri, gintinguhaan niya nga mabatuan ang iya balatian bangud sa iya anak nga nagaeskwela kag subong manugtapos na sa kolehiyo.
Suno kay Estampador, wala siya sang utod nga may psoriasis apang mahimo nga mga kalolohan pa niya ang una nga nag-angkon sini kag sa iya henerasyon naggwa.
