Ginkompirmar sang pinuno sang Office of the Building Official ukon OBO nga nakompleto na nila ang notice kag naendorse naman ini sa Bacolod City Legal Office para ipatuman ang pagpauntat sang pagtukod sang cellsite tower sang telecommunications company sa St. Therese Avenue, Doña Juliana Subdivision sa Barangay Taculing, Bacolod City.
Sa interview sang Bombo Radyo Bacolod kay Nester Velez, ginpahayag sini nga ginahulat na lamang nga ipatuman sang City Legal Office ang pagpauntat sang ginapaubra nga cellsite tower sa lugar.
Suno kay Velez, kun mapatuman na ang notice mabutang ang city legal sang tarpaulin sang order to stop sa construction kag nakabutang sa dalom sang tarpaulin ang no building permit.
Sa tion nga mag-untat ang pagconstruct sang cellsite tower kag ang contractor ang ma-apply sang building permit sa OBO ang notice ang mangin basehan sang ila nga assessment sa accomplishment.
Ginpahayag man ni Velez nga nagaissue sila sang tatlo ka notice apang kun magsige ang pagtrabaho sang tower sa pihak sang notice nga ginpagwa sang opisina maga-issue sila sang final notice.
Sa tion nga mag-issue na sila sang final notice gina-endorse nila sa city legal para sa enforcement kag ang final notice ang may nakabutang nga non compliance for works stoppage kag ini naman ang basehan nila sang pagpatuman sang administrative fines kun magapply ang contractor sang nasambit nga tower sang telco bangud makapatuman ang OBO sang administrative fines kun wala sang naissue nga final notice batok sa kompanya.
Nagpanindugan man si Velez sa tion nga mag-apply sang kompanya kag makita nila nga wala sang compliance magaisyu sila sang pinalidad kag indi man makaoperate ang cellsite tower kun wala sang permit nagikan sa OBO.
Madumduman nga nagpadangat sang reklamo ang mga pumuluyo sang St. Therese Avenue, Doña Juliana, Barangay Taculing, Bacolod City tuhoy sa ginapatukod nga cellsite tower sa lugar.
