Nakita ang pagdako sang “swelling” ukon ang paghubag sa lawas sang Bulkan Kanlaon humalin pa kahapon nga adlaw, Enero 10,2025 santo sa monitoring sang Philippine Institute of Volcanology and Seismology (Phivolcs) kadungan sini nakaalerto ang Office of Civil Defense Western Visayas sa possible nga liwat nga paglupok sang bulkan.
Sa statement sang ahensya, ginpahayag nga ila nakita ang pagdako sa tunga nga bahin sang lawas sang bulkan, pasaka sa baba sini.
Isa sa mga ginalantaw nga rason amo ang pressurization sa babaw nga bahin sang lawas sang nasambit nga bulkan.
Una namonitor ang paghabok sa southeastern nga porsyon sang bulkan sadtong last week sang December 2024.
Ginsundan ini sang deflation sa nakatungdan nga porsyon sang bulkan nga na-monitor sa first week sang Enero 2025.
Ang nasambit nga ground deformation ang pareho sang nakita sang Phivolcs antes matabo ang paglupok sang bulkan sang Disyembre 9,2024.
Dugang pa ang pagtaas kag hinali pagnubo sang sulfur dioxide (SO2) emission sang bulkan suno sa Phivolcs ang indikasyon nga ang manabaw nga alagyan sang magma sa bulkan ang karon ang naga-eksperensya sang pressurization kag posible magtuga sang paglupok kaangay sang natabo sang December 9.
Panugyan sang Phivolcs sa publiko nga dako ang posibilidad sang liwat nga paglupok sang bulkan.
Ginapaandaman ang liwat nga posible pagluntad sang pyroclastic density current (PDCs), ash fall, lava flows, rock falls kag iban pa nga volcanic hazards.
Nakaalerto man sa karon ang mga LGU kag DRRM council sa ano man nga posibilidad.
