Wala sang augmentation gikan sa iban nga police unit sa gwa sang Bacolod City sa nagahilapit nga Bacolaodiat Festival 2025, sa baylo ang Bacolod City Police Office ang magapadala sang augmentation sa Dinagyang festival sa Iloilo kag Ati-atihan Festival sa Kalibo.
Sa interview sang Bombo Radyo Bacolod kay BCPO Director Police Col. Joeresty Coronica, wala sang augmentation gikan sa iban nga estasyon kag unit sa gwa sang Bacolod City sa selebrasyon nga hiwaton sa Enero 31 tubtob Pebrero 2.
Sa pihak sini, ang Police Regional Office 6 ang nagrequest, nga ang BCPO ang makapadala sang augmentation nga masobra 300 personnel sa Dinagyang Festival kag masobra 200 personnel sa Ati-atihan Festival.
Suno kay Coronica, magarequest pa sini sa PRO 6 kun mahimo nga mapanubuan ang request sa augmentation bangod kinahanglan man sang tawo nga magabantay sang seguridad sa tatlo ka adlaw nga Bacolaodiat Festival.
Ginahatag naman sang City Director sa head sang operations department ang nahanungod sa detalye sang augmentation.
