BACOLOD CITY — Luyag sang grupo sang mga planters nga maathagan may kaangtanan sa pahayag ni Presidente Rodrigo Duterte nga dulaon na ang Sugar Regulatory Board.
Sang nagligad adlaw, ginpahayag ni Duterte nga kaupod sang Road Board, dulaon sini ang SRB bangud imbolbado ang mga ini sa korapsyon.
Sa interview sang Bombo Radyo, ginpahayag ni Manuel Lamata, presidente sang United Sugar Producers Federation of the Philippines ukon UNIFED nga nakibot man sila sa pahayag sang presidente kag nagalaom sila nga indi ini pagdayunon.
Kun may sala ang isa ukon duha ka opisyal suno kay Lamata, kuntani sila lang ang pinahan kag indi ang bilog nga board.
Ang SRB ang ginalakipan sang Department of Agriculture, Sugar Regulatory Administration, tiglawas sang millers association kag tiglawas sang planters association.
Bangud sini, may emergency meeting ang UNIFED sa Miyerkules agud usisaon kun ano ang matuod nga rason sa likod sang nangin desisyon sang presidente.
Suno kay Lamata, wala na sang may mabalanse sa sugar industry kun wala na sang SRB.
Samtang, madamo sang nagareklamo sa pigado nga pagpatuman sang Road Board sa mga programa kag proyekto sini.
Ini ang ginpahayag ni Bacolod Lone District Congressman Greg Gasataya angot sa plano ni Presidente Rodrigo Duterte nga pagbungkag sang Road Board kag duha ka iban pa nga ahensiya sang gobyerno bangud sa isyu sang kurapsyon.
Suno kay Gasataya, bisan siya ang may eksperyensiya sa ahensiya kun sa diin makapila ini magdangop sa Road Board agud mapunduhan ang pagpailis sang mga suga sa higad sang mga dalan sa ciudad kag distrito sang Bacolod.
Apang ang indi pagpaguwa sang pundo sang Road Board ang rason sang kadulom sang pila ka mga dalan, partikular sa Lacson, Araneta kag Circumferential Road.
Suno kay Gasataya, tuman kadaku sang pundo nga ginahatag sa Road Board apang tuman kagamay sang porsyento sang mga proyekto sa kadalanan nga ila mapatuman.
