Kumpyansa si Ombudsman Jesus Crispin Remulla nga magabalik sa Pilipinas sanday Senator Loren Legarda kag ang bata sini nga si Batangas Representative Leandro Leviste, matapos sila magbiya sa Pilipinas samtang may ginapangatubang nga imbestigasyon sa Office of the Ombudsman.
Ini ang may kaangtanan sa reklamo nga plunder kag graft batok kay Leviste kag sa iya renewable energy company.
Suno kay Remulla, nagasalig ini nga magabalik sa pungsod ang mag-iloy.
Apang nagpaandam ini sa ila nga mahimo mangatubang sang nagakaigo nga legal nga tikang kun indi sila magpauli.
Samtang, gin-athag ni Senator Loren Legarda nga ang pagbiya sa Pilipinas ang kabahin sang iya na-aprubahan nga medical leave humalin Agosto 3 tubtob 5, santo sa mga patakaran sang Senado.
Ginhingyo man niya sa publiko nga indi i-connect ang iya biyahe sa mga wala basehan nga akusasyon batok sa iya.
Nauna naman nga ginpahibalo sang National Bureau of Investigation (NBI) nga nagbyahe si Legarda padulong sa France, samtang si Leviste naman ang nag-agi anay sa Hong Kong antes nagdiretso sa France.
Angot diri, nag-file man sang reklamo ang Department of Energy sa Department of Justice batok kay Leviste kag sa pila ka mga opisyal sang Solar Para sa Bayan Corporation bangud sa gin-alegar kapaslawan nga maghatag sang suplay sang kuryente sa mga malagyo nga lugar sa pungsod, santo sa kaundan sang prangkisa.
