Ginalantaw nga “onsehanay’ sa ilegal nga druga ang motibo sa pagpangluthang sa Gatuslao Street, Brgy 9, Bacolod City sang nakaligad nga Huwebes, Pebrero 12.
Madumduman nga ginluthang sang wala pa matumod nga suspetsado ang mag-angkasanay sa motorsiklo, kun sa diin napatay ang backrider nga si Christian Sarsona alyas Krung Krung, 18 anyos, samtang pilason naman ang driver nga si Alyas Noknok.
Sa interview sang Bombo Radyo kay Bacolod City Police Office Director Police Colonel Eugene Rebadomia, “onsehanay” sa ilegal nga druga ang ginalantaw nga mayor nga motibo sa likod sang nasambit nga krimen.
Luwas sa motibo sang ilegal nga druga, naggwa man sa imbestigasyon nga ang isa sa mga biktima ang nagagamit sang lain-lain nga mga pangalan.
Ginapahayag nga involved ang mga ini sa pagpangawat ukon “tuktok kalawit,” kag narekober man sa mga biktima ang duha ka cal .38 caliber revolvers sang natabo ang insidente.
Sa karon, padayon pa ang backtracking sang mga otoridad sa mga CCTV footages sa palibot sang crime scene agud matumod ang mga suspetsado.
