BACOLOD CITY — Ginaabisuhan sang Overseas Workers Welfare Administration (OWWA) ang mga Pinoy workers nga magabalik sa pungsod Qatar nga magsaylo na sang airline company nga magadala sa ila sa nasambit nga pungsod.
Ini ang ginpahayag ni OWWA Western Visayas Regional Director James Mendiola sa interview sang Bombo Radyo kasunod sang pagpauntat sang pila ka airline companies sang biyahe padulong sa nasambit nga pungsod matapos nga gin-utod sang siyam ka Gulf countries sang ila diplomatic ties didto.
Suno kay Director Mendiola, kun ang eroplano nga ginkuhaan sang ticket sang isa ka OFW nga magatrabaho sa Qatar ang nalakip sa mga temporaryo nagpauntat sang ila serbisyo padulong sa amo nga pungsod, dapat na nga magsaylo ang mga ini sang airline company agud indi mag-angkon sang huol ang ila pagbiyahe.
Kumpiyansa naman si Mendiola nga indi mabudlayan ang mga OFWs bangud ang tanan nga airlines nga nag-anunsyar nga indi maghugpa sa Qatar ang nagpasalig nga ila iga-refund ang ginbayad sang OFWs ukon iga-refer sila sa iban nga airline companies.
Nahibaluan nga kasunod sang pag-utod sang diplomatic ties sa Qatar, nagpatuman sang ban ang Department of Labor and Employment (DOLE) sa tanan nga returning workers kag newly-hired nga Pinoy sa Qatar apang gilayon man ini ginbatak pagkaligad sang isa ka adlaw.
