Nagpain ang Department of Agriculture (DA) sang P1.25 billion agud mabuligan ang hog industry nga makabangon sa African Swine Fever (ASF) ilabi na bangud nagapabilin nga mataas sagihapon ang presyo sang karne sang baboy bangud sa limitado nga supply.
Sa ginpagwa ni Agriculture Secretary Francisco Tiu Laurel Jr. nga memorandum Circular No. 2, nakasaad ang pagpatuman sang swine industry recovery project (SIRP) agud nga maduso ang modernisasyon sa swine industry.
Suno kay Laurel, katuyuan sang programa nga mapabaskog ang biosecurity, mangin mas moderno ang farm infrastructure, mapaayo ang genetic quality kag mapasangkad ang market access.
Paagi sini suno sa natungdan, mas malapad ang malab-utan kaangay sang magagmay nga farmers, kooperatiba, commercial breeders, kag at-risk agricultural communities nga nagatanyag sang customized assistance nga maka-restore, modernize kag maintain sang produksyon sang baboy sa bilog nga pungsod.
