Dako ang pagpasalamat sang gobernador sang Negros Occidental sa maathag nga paghatag sang pagtamod ni President Ferdinand ‘Bongbong’ Marcos Jr. sa mga farmers kag fisherfolks.
Sa interview sang Bombo Radyo Bacolod kay Negros Occidental Provincial Governor Eugenio Jose ‘Bong’ Lacson, 5,000 ka mga farmers kag fisherfolks nga nahalitan sang El Niño phenomenon ang hatagan sang tag-P10,000 nga financial assistance para sa Presidential Assistance for Farmers, Fisherfolks and Families (PAFFF).
Gindumdom sang gobernador nga sa ulihi nga pagbisita sang presidente, ini ang naghatag man sang land title kag farm machineries sa mga Agrarian Reform Beneficiaries sa Bago City.
June 27, ang presidente ang liwat naman nga magabisita dala ang ayuda nga patigayunon sa football field sang University of Negros Occidental – Recoletos (UNO-R).
Pahayag ni Lacson nga 10,000 ang listahan sang recipient, gani nagalaom ini nga may masunod pa nga batch sang paghatag sang ayuda.
Ang listahan sang benepisyaryo ang napaidalum man sa screening process sang Department of Agriculture.
Magapatigayon lamang sang symbolic turn-over sa 10 ka mga benepisyaryo, samtang ang nabilin nga budget ang itugyan na sa provincial government.
Pasalig ni Lacson nga tinguhaan nila nga gilayon nga marelease ang pondo, agud makabulig sa recovery stage sang mga farmers kag fisherfolks.
Makadali lamang ang pagbisita sang presidente bangod ini ang gilayon man nga magabyahe padulong sa iban pa nga lugar nga patigayunan man sang kaangay nga hilikuton.
Indi naman masiguro ni Bacolod City Mayor Alfredo ‘Albee’ Benitez kun ano oras kag kun dungan ang pag-abot ni President Bongbong Marcos kag First Lady Liza Araneta Marcos.
Magluwas sa Presidential Assistance for Farmers, Fisherfolks and Families sang presidente, magapatigayon naman sang ‘Lab for All’ Caravan ang first lady.
Ang proyekto ang magahatag sang libre nga laboratory services sa ginabanta 1,500 nga benepisyaryo.
