Gin-aprubahan na sang Sangguniang Panlungsod ang P4.4 billion budget sang Bacolod City para sa 2025.
Sa interview kay Councilor Jude Thadeus “Thaddy” Sayson, chairperson sang Committee on Appropriations and Finance, natigayun nga maaprubahan ang proposed budget sa regular session sang konseho.
Gani epektibo Enero 1, ang P4.4 billion ang magamit na sang ciudad.
Pag-abot sa kadakuon sang ginapasweldo, gin-athag ni Sayson nga ini ang nakadepende sa kadakuon sang personnel kaangay lamang sa Bacolod City Engineer’s Office, City Health Office, City Disaster Risk Reduction and Management Office kag Department of Social Services and Development.
Apang pag-abot sa development funds sang mga ahensya, ang may dako nga alokasyon amo ang City Engineer’s Office kag Mayor’s Office.
Samtang ang budget ang gin-alokar man sa mga proyekto nga makahatag sang effecient services.
Ang budget sang ciudad ang may pagsaka nga P800 million gikan sa P3.6 million subong nga 2024.
Suno kay Sayson, nagsaka ang annual budget bangod nagsaka man ang revenue sang ciudad nga pamatuod sang pag-uswag sang ekonomiya sa Bacolod City.
Sa P4.4 billion annual budget, P1.7 billion ukon 40.42 percent ang magakadto sa social services, P1.5 billion ukon 34.99 percent ang magakadto sa general public funds, P401 million ukon 9.11 percent para sa economic services kag masobra P689 million ukon 15.68 percent ang para naman sa other services kag projects.
