Gin-athag sang political analyst nga apisar nagapangibabaw sa survey sang popular votes si US Vice President Kamala Harris, ini ang indi gihapon makapasalig sang pagdaog.
Sa interview sang Bombo Radyo Bacolod kay Atty Jomax Ortiz, lima ka beses na nga natabo sa America nga ang Presidential candidate ang nagdaog sa popular votes apang napierde gihapon sa eleksyon.
Paathag sang political analyst nga indi popular vote ang nagapili sang Presidente kundi ang electoral board.
Suno diri may 538 ka mga electors kag ang makakuha sang majority nga 270 votes, amo ang mangin masunod nga Presidente kag Bise Presidente.
Suno diri may-ara na sang secured nga 226 votes ang Democrats samtang 219 votes naman ang Republicans.
Gani magalagsanay na lamang sanday Kamala Harris kag Donald Trump sa pagkuha sang pito ka swing states nga ginalakipan sang Nevada, Pennsylvania, North Carolina, Wisconsin, Georgia, Arizona kag Michigan.
Ang tagsa ka estado ang may-ara man sang natalana nga numero sang electoral board.
Sa latest survey, kontrolado ni Harris ang Nevada, Pennsylvania, Wisconsin kag Michigan ukon dugang nga 50 votes samtang yara naman kay Trump ang North Carolina, Georgia kag Arizona ukon dugang nga 43 votes.
Apang ang numero ang sarang pa magbag-o ilabi na nga padayun pa ang pagpangampanya sang duha ka Presidential candidate.
Kun mapadayun ni Harris ang momentum, siya ang makakuha sang 276 votes nga lapaw sa majority nga 270 votes.
Hinali magdaog, siya man ang mangin first female US President, fist female black American US President kag 2nd black American President sunod kay former President Barrack Obama.
Paathag ni Ortiz nga crucial ang mga swing state bangod bisan dikit ang boto sang mga electoral boards sa estado, kun tingubon ini ang dako nga dugang sa boto.
Halimbawa sini ang Wisconsin nga may 10 ka electoral boards, kag kun sin-o ang makakuha sang mayorya, makabi na sini ang kabug-usan sang 10 ka boto.
Sa pihak nga bahin, kun magtie naman, ang House of Representatives amo ang magadesisyon sang madaog.
