Ginkumpirmar sang Department of Information and Communications Technology (DICT) kag Cybercrime Investigation and Coordinating Center (CICC) nga ginbawi na ang pag-ban sa ‘messaging platform’ nga Discord.
Suno kay CICC Executive Director Usec. Renato ‘Aboy’ Paraiso, ginmando na sang ahensya ang paglift sa ban sang nasambit nga ‘online platform’.
Ang desisyon ang kasunod sang meeting nga ginpatigayon sang ahensya kag sang mga tiglawas sang Discord.
Natalakay kag ginkasugtan ang pagpakig-angot sang ‘messaging platform’ sa gobyerno agud mapabaskog ang pagprotekta sa mga kabataan.
Suno diri, ginhatagan sila sang green lane para pahanugutan ang ahensya nga ma-track kag ma-monitor ang mga makaduluda nga aktibidad online.
Apang, sa pihak sang positibo nga report, nagpangayo sang pasaylo si Usec. Paraiso sa tanan nga naapektuhan sang pila ka oras nga ban sa ‘messaging platform’.
Suno naman kay DICT Secretary Henry Rhoel Aguda, ang mando sa pag-ban sa nasambit nga ‘online platform’ ang indi nangin mahapos para sa ila.
Suno diri, ang tikang may kaangtanan sa nagasaka nga kaso sang NVE ukon Nihilistic Violent Extremism.
