Wala sang nakita nga problema ang presidente sang Bacolod City Public School Teacher’s Federation bisan buhinan sang 15 ka adlaw ang school days agud ini ang mabalik sa tradisyunal nga school calendar sa 2025.
Sa interview sang Bombo Radyo Bacolod kay Richard Gelangre, principal sang Bacolod City National High School, welcome para sa iya ang lihok ni President Ferdinand “Bongbong” Marcos Jr.
Gindumdom sini nga sang 2020 ang umpisa sang pagligwat sang school calendar bangud sa COVID-19 pandemic apang ini ang nakatuga sang pag-antos sang mga estudyante bangod sa tuman nga kainiton.
Ginalauman sini nga imbes sa 2027-2028, mabalik na ang traditional school calendar sa masunod nga tuig.
Suno sa principal, apisar nga nabuhinan ang 180 school days kag mangin 165 days na lamang, indi man nagakaangay nga magklase kun Sabado bangod ini ang mabug-at naman para sa mga manunudlo.
Panugyan sini nga ang himuon na lamang agud mapaigo ang school days amo ang pagminimize sang mga unnecessary reports, programs kag projects kag 90 tubtob 95 porsyento sang oras sang mga manunudlo ang i-focus na lamang sa classroom instructions.
Paathag sini nga magluwas sa cards kag regular nga school forms, madamo sang dugang nga reports kag program nga ginapa-implementar ang DepEd division kag national office.
Kun mabalik na ang regular school calendar, Marso na lamang ang tig-ilinit nga bulan ang agwantahon sang mga estudyante.
Aminado ini nga ang asynchronous classes ang mabudlay bangod madamo sang mga estudyante nga wala man naga-obra sang activities, gani ini ang epektibo gid lamang sa mga mapisan magtuon.
Gani mas positibo ini sa pagbalik sang daan nga School Calendar agud indi na kinahanglan ang alternative delivery modes bangod sa tuman nga init kag mabalik na sa face-to-face classes kun sa diin matutukan na ang mga kabataan.
