Padayon ang pagbantay sang Moises Padilla Municipal Disaster Risk Reduction and Management Office (MDRRMO) sa pag-ilig sang tubig nga may abo sa mga suba sa banwa.
Sa interview sang Bombo Radyo kay Moises Padilla- MDRRMO Head Reynaldo Horegue, may mga suba sa banwa nga naga-eksperyensya sang lahar flow gikan sa bulkan Kanlaon.
Suno diri, indi man makabig nga tuman ka delikado ang sitwasyon bangod wala man sang may naeksperyensyahan nga madamol nga pagbubo sang ulan kag normal ang level sang tubig sa suba.
Apang, bangod nga may abo ang tubig nga naga-ilig sa suba, dako ang tsansa nga magkalamatay ang mga isda.
Suno kay Horegue, 24 oras ang ila monitoring sa mga suba ilabi na kun naga-ulan sa banwa sang La Castellana bangod sa Moises Padilla ma-ilig ang tubig nga gikan sa babaw./
Sa karun, nagapabilin sa alert level 3 ang status sang bulkan kag ginalauman ang posible nga liwat nga paglupok sini.
Yara man sa gihapon sa evacuation area ang mga gin-evacuate kasunod sa paglupok sang bulkan ilabi na ang mga nagapuyo sa sulod sang 6km radius permanent danger zone nga hugot nga ginadumilian ang pagbalik sa ila mga tagsa ka panimalay.
