Ginkwestyon sang grupo sang mga taxi drivers sa Bacolod City ang pag-issue sang bag-o nga taxi fare matrix nga wala sang recalibration sang ila Taxi Meter.
Sa interview sang Bombo Radyo Bacolod kay Ronald Allan Salgado, Presidente sang Samahan ng mga Taxi Association sa Bacolod, nakibot sila sang nabasahan nga ang bag-o nga flagdown rate ang ginpasaka sa P65.
Suno diri, sa P50 pa lamang nga flagdown rate madamo na ang nagareklamo.
Nahibaluan nga sa bag-o nga taxi fare matrix, P65 ang flagdown rate, kag may-ara na sang P13.50 nga adisyunal sa kada dugang nga kilometro, kag P2 per minute travel time.
Suno sa iya bangod wala nacalibrate ang ila metro, indi na nila ini magamit sa pagpasakay sang pasahero, bangod ini ang magapabilin sa P50 nga rate, gani kun ipilit nila ang bag-o nga flagdown rate, mahimo nga magbaisay lamang ang taxi driver kag pasahero.
Gintawag man ni Salgado ang implementasyon nga ‘pamatay’ sang palangabuhian.
Ini bangod sa karun, gamay nalang gid ang ila kita bangod sa naganubo nga pasahero.
Dugang pa sini nga madamo na sila sang kompetinsya, partikular na ang TNVS.
Gani nagapati ini nga sa dako nga pagsaka sang pletehan sa taxi, madamo sang pasahero nga magapangita na lamang sang alternatibo nga masakyan.
Suno sa grupo, antes kuntani nagpagwa sang bag-o nga taxi fare matrix, nagpatigayon anay sang public consultation.
Apang kun luyag nagid nga ma-implementar, pangabay sang mga ini nga irecalibrate anay ang ila nga metro.
