Liwat nga nagdangop sa Bombo Radyo Bacolod ang pila sa mga taxi drivers nga wala nakabaton sang fuel subsidy bangud suno sa isa ka staff sang Land Transportation Franchising and Regulatory Board (LTFRB) nga nahatag na sa ila operator ang cheque para sa ila nga ayuda.
Sa interview sang Bombo Radyo Bacolod kay Ronald Allan Salgado, Presidente sang Samahan ng mga Taxi Drivers sa Bacolod, alas 6:00 pa lang sang aga kahapon nagpadulong na sila sa Ayala Mall Capitol Central para sa special payout sang fuel subsidy.
Suno kay Salgado, sa kapin 200 sila nga nagpila yara lamang sa 55 ka mga taxi drivers ang nakabaton.
Suno diri, ginpahayag sang staff sang LTFRB nga nahatag na sa operator sang GD kag Bitline taxi ang fuel subsidy para sa mga drivers.
Samtang sang gin-verify naman ni Salgado sa operator, hugot naman nga nagpanginwala ang mga ini nga nakabaton sila sang cheque para sa fuel subsidy sang mga drivers.
Ginpanugyanan naman ni Land Transportation Franchising and Regulatory Board-Negros Island Region (LTFRB-NIR) Director Atty. Gerry Llena si Salgado, nga tipunon ang pangalan sang mga taxi operators kag mga drivers nga wala nakabatun sang fuel subsidy.
Suno kay Llena, kun makuha niya subong nga adlaw ang pangalan sang operator kag drivers sang taxi, iya ini nga i-cross match agud mahibaluan kun nahatagan gid man ukon wala.
Suno diri, kun nahatag na sa operator, ipatawag niya ini agud nga mahatag ang bulig nga nagakadapat para sa mga drivers.
Pahanumdom sini nga ang mga operator ang may yara sang kaugalingon nga financial assistance, gani dapat nga ihatag sa mga driver ang ayuda nga gintalana para sa ila.
Suno sa LTFRB-NIR Director, nagakatabo gid man kun kis-a nga ang fuel subsidy nga para sa mga drivers ang ginahatag sa mga operator, kag ang mga ini na amo ang magahatag sa mga driver bangud per operator ang nakarehistro sa ahensya kag indi per driver.
