BACOLOD CITY — Nakibot ang mga residente sa ciudad sang La Carlota City matapos ang pag-ulan sang magagmay nga ice subong nga hapon.
Sa interview sang Bombo Radyo Bacolod kay Dr. Zeaphard Gerhart Caelian, head sang Provincial Disaster Management Program Division, narekord ang pagtupa sang ulan nga may upod nga hailstones sa Barangay San Miguel, La Carlota City.
Suno kay Caelian, madamol ang pag-ulan sa nasambit nga na barangay pasado alas 3:00 kaina sang hapon nga nga gin-updan sang hailstones.
Sa rekord sang rain gauge sang probinsiya, nagdangat sa 8.5 millimeters ang ulan nga nagtupa sa lugar.
Paathag ni Caelian, nagaluntad ang pag-ulan sang hailstones sa tion nga mainit ang panahon apang hinali lang nga may nagaluntad nga thunderstorms ukon pagkilat kag pagpanaguob.
Nagaporma sa sulod sang cumulonimbus clouds ang ice kag nagadungan ini sa pagtupa sang ulan bilang hailstones.
Apang suno sa PDMPD head, wala naman ini sang malain nga epekto sa pananom sang mga residente.
