Hugot ang pagbantay sang Office of the Civil Defense – Negros Island Region sa mabaskog nga pag-ulan tuga sang mas ginpabaskog nga Habagat bangod sa Bagyo INDAY, subong man sa posibilidad sang pagluntad sang lahar flow sa palibot sang Bulkan Kanlaon bangod sa madamol nga pag-ulan.
Ini kasunod sang natabo nga Moderately Explosive Eruption kahapon sang aga, nga nagresulta sa pagtimbook sang abo gikan sa crater sang Bulkan sang kapin duha tubtob tatlo ka kilometros.
Sa interview sang Bombo Radyo Bacolod kay OCD-NIR Director Donato Sermeno III, sa forecast ginalantaw nga mas madamol ang mangin pag-ulan sa Negros Island Region subong nga adlaw tubtob bwas.
Gani luwas sa posibilidad sang mga pagbaha, ginabantayan man ang peligro sa posibilidad sang pagluntad sang lahar flow.
Ginapakamaayo naman ni Sermeno nga wala sang nagluntad nga lahar flow kahapon apisar sang mga ashfall nga gina-alegar nakalab-ot pa sa Cebu kag may-ara pa sang reported nga ballistic projectiles.
Apisar nga wala sang tawo ang OCD, 24/7 naman nga bukas ang Emergency Operations Center kag sila ang padayun man nga nagakoordinar sa mga Local Disaster Risk Reduction and Management Offices.
Panawagan sini sa mga pumuluyo malapit sa Bulkan nga magkoordinar sa mga local officials kag mangin preparado sa pag-evacuate.
Pahanumdom sini nga dapat nakatuon na sa natabo sa Bagyo TINO kag indi na pag-iunderestimate si Bagyo INDAY.
