Pagbilin sang lungon nga may “anti-China” nga mensahe sa dalanon, ginkondenar sang DFA

Ginkondenar sang Department of Foreign Affairs (DFA) kahapon sang Biyernes, ang pagbilin-bilin sang mga lungon nga may mensahe nga anti-China sa nagkalain-lain nga bahin sa Metro Manila.

Gintawag sang DFA nga “iresponsable kag wala respeto” ang insidente kag nagpahayag nga indi nila i-tolerar ang ini nga mga buluhaton.

Ginpaathag sang ahensya nga apisar ginakilala ang kahilwayan sa pagpahayag, indi sini sakop ang pagpamahog batok sa kun sin-o man nga dumuluong ukon opisyal sang iban nga pungsod.

Suno pa sa ahensya, seryoso ang gobyerno sa pasalig nga siguruhon ang seguridad sang mga foreign diplomat santo sa Vienna Convention.

Dugang pa sang ahensya, ang pagpamahog sala nga pamaagi sa pagdiskurso sang mga Pilipino sa mga sensitibo nga isyu pampolitika.

Sa karon, nagapakig-angot na ang DFA sa mga otoridad agud matumod ang mga responsable sa insidente.

Nagdangat na sa lima ka lungon ang gin-abandona sa magkatuhay nga mga lugar ukon kalsada partikular na sa Maynila, Quezon City, Makati, kag Caloocan.

Ang lungon nga nakit-an sa Welcome Rotonda ang nagaunod sang nawong nanday Chinese President Xi Jinping, Foreign Minister Wang Yi, kag Ambassador Jing Quan.