Magadepende na kay Bacolod City Police Office (BCPO) Director Police Colonel Henry Biñas ang plano ni Police Lt. Colonel Jovie Espenido nga mangin commander sang Police Station 3.
Ini ang ginpahayag ni BCPO Spokesperson P/Lt. Colonel Ariel Pico, nahananugod sa pagpabutyag ni Espenido sang iya kaluyagan nga mangin hepe sang Station 3.
Suno kay Pico, kun basehan ang ranggo ni Espenido, pwedi na gid ini nga mangin station commander.
Nahibaluan nga nagapungko karun si Espenido nga Deputy City Director for Operations kag head sang City Drug Enforcement Unit.
Samtang temporaryo naman nga commander sang Station 3 si Deputy City Director for Administration si Lt. Colonel Levy Pangue.
Sa pihak nga bahin, nagapanugyan si Pico sa mga kabarangayan nga magtinguha man agud madeklarar nga drug-cleared.
Ini ang pahayag ni Pico kasunod sang pagduso naman karun sang City Anti-Drug Abuse Council (CADAC) sa regional oversight committee sang 13 ka mga barangay sa ciudad nga madeklarar nga drug-cleared.
