Ginpahayag sang resident volcanologist sang Kanlaon Observatory sa ciudad sang La Carlota, Negros Occidental nga padayon ang ila monitoring sa aktibidad sang Bulkan Kanlaon.
Sa interview sang Bombo Radyo Bacolod kay Engineer Mari-Andylene Quintia, sa nagligad nga 24 oras may narecord sila nga 14 volcanic earthquakes kalakip na ang duha ka mahinay nga duha ka volcanic tremor nga nagduhay sang 50 minutos.
Suno kay Quintia, narecord man ang 3,511 tones kada adlaw ang nagpagwa sang bulkan nga Sulfur Dioxide.
Suno diri, nagapadayon man ang degassing sang bulkan nga may kataason nga 100 meters kag ini ang padulong sa southwest nga direksyonaa.
Nagapadayon man ang paghubag sang lawas sang bulkan kun sa diin sang tinalikdan nga aldlaw nagdako ang paghubag sini.
Suno kay Quintia, ang Bulkan Kanlaon ang may ground deformation naman nga daan apang sang Sabado nagpagwa sila sang advisory bangud nakita nga significant ang paghubag sang upper pantao sa bahin sang bulkan.
Apang gin-athag man sini nga wala man nagpadayon ang dako nga paghubag sa nasambit nga bahin sang bulkan.
Ginpahayag ni Quintia nga ang significant sang ground deformation nga nakita nila sang Sabado amo nga daw kaangay ini sang nakita antes ang paglupok sang Bulkan Kanlaon sang December 9.
Ang nasambit nga inflation kag pagnubo sang sulfur dioxide emission ang mahimo indikasyon nga liwat magalupok ang Bulkan Kanlaon.
Nagapabilin sa Alert Level 3 ang Bulkan Kanlaon.
Padayon nga ginapaaligmat ang tanan bangud sa mga aktibidad sang bulkan.
