Wala ginadula sang bise alkalde sang Bacolod ang posibilidad nga i-lift ukon idowngrade ang enhanced community quarantine sa ciudad sang Bacolod.
Sa exclusive interview sang Bombo Radyo Bacolod kay Bacolod City Vice Mayor El Cid Familiaran, chairman sang inter-agency task force against coronavirus, iya ginpahayag nga ang mga tikang nga ila ginapatuman sa karon agud nga matapna ang paglapta sang coronavirus disease 2019 (COVID-19) ang isa sa mga paagi agud nga batakon na ni Mayor Evelio “Bing” Leonardia ang ginapatuman nga ECQ.
Suno kay Familiaran, kun magsunod lang ang tanan sa mga preventive measures nga gina-implemtar, posible gid makabalik sa normal ang tanan-tanan.
Apang kun magsige lamang padungol ang iban, madugayan pa ini.
Ginkumpirmar man ni Familiaran nga imbitado man sila sa pagsinapol sang probinsya subong nga adlaw agud istoryahan ang mga tikang nga ila pagahimuon para dalayon na nga matapna ang COVID-19.
Suno diri, maayo ini para sa tanan agud nga may yara sang koordinasyon ang ciudad kag ang probinsya.
Samtang, ginpahayag man ni Familiaran nga posible indi na pagpahanugutan ang mga taga-probinsya nga makapamakal diri sa Bacolod subong nga ginapatuman na ang number coding scheme.
Ini agud malimit pa gid ang pag-giho sang mga tawo sa ciudad.
Suno sa bise alkalde, mahimo man siguro makapamakal ang mga ini sa ila tagsa ka banwa ukon ciudad.
Dugang pa ni Familiaran nga nagahulat pa sila sang mando ni Mayor kun paano ang mga nagapuyo diri sa Bacolod nga may yara sang negosyo sa gwa sang ciudad.
